2026年係我「滾動 30年」我一定會為自己做D搞作，所以第一炮就係 Lemans 24 小時耐力賽！
第一次玩 24 就玩 24，第二次就玩 DUO 而經過一場「最偉大嘅戰役」 得到了第二名！
今次第三次玩， 我就認認真真比賽， 認真訓練半年， 目標清晰明確直指冠軍！
今次真係好認真 我仲做咗四日到巴黎適應當地溫度，不過一如以往，我冇一個比賽係順順利利嘅。可能呢個就係上天畀我哋嘅考驗，比賽撞正歐洲熱浪，超過40度，比賽面臨取消。好彩大會最後同政府講點數，由24小時減10小時變成14小時耐力賽，避開最炎熱中午先至可以開始比賽。
由24小時變成14小時好似簡單咗，但係其實對我隊係十分之不利，所有之前嘅計劃完完全全失效。
呢一條千字文， 我唔再交代比賽情況，起起跌跌在心中，呢14個鐘頭嘅心路歷程， 同埋所發生嘅事， 基本上冇可能用文字寫出嚟。
簡單講成個比賽完全係鬥志鬥力，一開頭完全大失誤，過程中由落後兩分幾追到反超，再落後七分幾再反超，真心仲刺激個過山車！
中途完全有「冇機會」的感覺，但我地又唔想放棄，所以我哋中途變過好多好多次陣，不停計算對手，希望搵到可以反敗為勝的方法。我地不停調整出場次序、裝備選擇等等。最終我地仲比對手多一圈完成比賽，得到冠軍。
只能說十分多謝隊友，佢地完全「不要問只要信」，所有調動完全冇問點解，即時執行！有力就去盡，冇力都死頂！
我形容過上嚟 DUO 24係我「最偉大嘅戰役」，今次可以話係「最難但係最精彩嘅冠軍」。
除此之外，最特別嘅係我有一班人同我一齊發癲，三十幾人去歐洲比賽的確唔易，而且女子隊有意外的冠軍， 少年隊苦戰下有亞軍！
