好忙好變態的2024年

年尾出世的我，2024年係我最後11個月「3字頭」。近年我學生越來越有成績，公司都越打越多出路，我常常會問自己，如果我當年有今時今日的資源、訓練系統、國際支援、品牌支援等等，究竟我的滾軸溜冰水平我可以去到幾高、滾得有幾遠？如果我做全職運動員，我可以有乜成績等等…

近十年都已經好多人話太遲了、太老了、運動生涯完了，運動員到 27 28 歲就已經玩完、退休啦等等，不過我唸一唸計一計，如果唔計我D香港冠軍、英國冠軍、細比賽D獎的話，其實我34歲先有歐洲第六 同開始玩 100K…37歲先有 Berlin A 槍資格同上 Sportsoho做封面、而38歲仲上台公開賽頒獎台，而且又得到法國24小時耐力賽亞軍…..的話…真係所謂太遲同玩完？

我由滾軸溜冰生涯 20 周年開始，每一年都會搵個挑戰俾自己，因為我知道當冇咗目標就會好似冇咗個靈魂一樣，加上年齡開始大，所以我就由以前的場地賽轉戰公路。

當開始玩 42K 之後一路都好想玩 WIC，之前一路到有斷斷續續玩過幾站，好多年之前諗過之後要搵一年試下玩曬成個 Series。但要用好多時間、金錢同精神。無論比賽、訓練同工作都要計劃得好好！

今年係我三字頭最後一年，而且現在的情況比賽可以多少少時間出走，公司開始穩定、學生的訓練已見成效同已有計劃、教練情況都易安排，所以我決定今年就做我呢一個計劃，我要認真對待 WIC 2024！

其實如果要玩曬 5 站的話唔難，雖然我冇錢但係錢係可以解決問題，但係我唔係要是是但但完成五站，而係「唔失禮」地完成，我知我唔會有任何機會有獎，但我要做到過到自己的成績！

我就要睇吓我用今時今日嘅資源、技術、對呢個運動嘅了解、訓練方式，加上唔影響現有工作並同時再搞大的情況下，我呢個「運動界呀伯」可以去到乜 level！都係一句，去盡後悔！

WIC 係我2024年「競賽級」的挑戰，識我的人應該會知呢個計劃唔會滿足到我，除咗 WIC 外都已經計劃了幾個「project」。我會一路 update 呢一頁到 2024年完結，希望我呢個 2024 「最後的三字頭計劃」除咗可以挑戰自己之外，都可以帶大家走出香港，睇多D外面的滾軸溜冰世界。

如果有興趣 Sponsor 我旅費的話，無論係金錢同用具，我都十分歡迎，可以搵我呀 ~~ ~~ 哈哈

半預告

• 最少6隻馬
• 最少兩個場地賽
• 一個極限挑戰
• 一個新嘢
• 將會完成兩個 To do list 項目
• 飛最少 23 程 飛機

今次呢個比賽係列好唔同，有機會去晒五場比賽，每一場都做到自己PB時間，都可以係「冇成績」。有機會用十幾萬比完比賽好似冇跑過，連個名都冇。每個人嘅要求唔同，有人冇獎嘅比賽唔會去，年齡組別唔啱嘅比賽都唔會去，今次我呢個比賽系列，我嘅目標只係榜上有名，呢個比賽係要計分，你跑晒同跑得好快都可以係冇分，要有特定名次先有分。

識我嘅人都知，我會為一件我要做嘅事而準備，今次我都照準備咗成年，不過唔知點解每一次比賽前都仲有事發生！舊年廿四小時比賽之前，腳掌受傷，好彩最後都叫做好得切。今年都唔例外，大約最後一個月訓練時搞傷膝頭，應該要加強訓練嘅時候，就偏偏要減少訓練。比賽前10日再黎舊患復發，急性發炎，唔好話行路，連落床都痛。所以呢10日我做治療仲多過行路，唔好話去練……紅外線、EMS、拉筋、推拿、按摩、泵腳、針灸、冷雷射、熱雷射、磁療、超聲波、衝擊波、電療….基本上有乜嘢可以做到做晒…..原本計劃得好好的訓練，到最後一個月變成完全荒謬到出發前呢一刻仲未搞好，不過無論如何都係嗰句「去盡無悔」！又要睇吓我呢隻爛船仲有冇3分釘

咁啱今日出咗報道，咁啱個主題係「追風路上的堅持」，可能就係叫我追住個颱風，堅持呢兩場比賽到終點 ，返香港先再繼續治療

BTW, 大部份人都 二字尾退休唔再比賽，30歲就已經可以參加先進組，我會唔會係最大年紀的 WIC skater 呢？

2024-06-02 速度滾軸溜冰世界盃 WIC 第一站 葡萄牙 FUNCHAL

呢一站雖然得到組別第二名，得到我等一個國際馬拉松獎項，但未能獲得 WIC 分數。所以跑咗一站仲係「榜上無名」！

2024-06-09 速度滾軸溜冰世界盃 WIC 第二站 法國 Rennes

經過一星期喺英國回復慢滾，個膝頭明顯紓緩咗唔少，不過條小腿筋反而好似嚴重咗。行咗幾間藥房都買唔到撒隆巴斯！最後都係頂硬上！